Hear Dem

Hear dem a sing dem song
Unnuh hear dem, unnuh hear dem
Singing dem song and down-pressing demself
“Eternal father bless our land”
Yet dem nuh know weh dem land deh
Hear dem a sing dem song
Hear dem, hear dem

Hear dem a sing dem song
“Wash me whiter than snow”
But why wash yuh black self though?
If god did i-rate di I inna di I image
Den how jesus yuh god fava hahmonie porridge?
Hear dem a sing dem song
Hear dem, unnuh hear dem

Hear dem a chat dem chat
“Out of many, one people”
Unnuh stap dat!
Weh di “many” deh?
When a black people fill di streets
How wi fi rise when king james tie wi feet?
Hear dem a chat dem chat
Hear dem, unnuh hear dem

Hear dem a chat dem chat
Politishan, hear dem a chat dem chat
Weh di last excuse why Marcus Garvey can teach in schools?
Silly Syrian seh di people will “misinterpret”
But is like him one have di “understanding”,
suh him can research it
hear dem a chat dem chat
hear dem, unnuh hear dem

Hear dem a denounce dem King
Hear dem unnuh hear dem
Hear dem a swear to queen elizabeth
Hear dem, unnuh hear dem
Inna dem court and “inaugurations”
How can a blind ones lead a nation?
Hear dem a chat dem chat,
hear dem unnuh hear dem…

sekou.tafari
08/06