Teach Di Yutes

babylon guweh wid yuh ham, bun & yuh cheese wid junjo,
civilized people and dem a gulp dung bare fungus.
i a real nyah nyah bongo,
police bwoy nuh dare put yuh bloody hand inna mi congo.
waan charge i fi "bloodclaat" & "bumbo",
LIGHTNING & THUNDER BWOY, a weh ya run guh?!
soldier bwoy a weh ya carry gun guh?
politishan yuh caan bribe i, not even wid yuh lump sum.
herpes & AIDS and now yuh waan gi i condom?
burn folly instituation! LIFE principles fi hand dung.
teach di yutes fi live, mek di princess dem have fun,
work bring LIFE rewards, suh full-courage dem at random.
teach dem LIFE worth more than car & digicel samsung,
teach dem bout di i-ncients and how fi dem 'song' sung.
teach dem fi give yanks and i-spect EARTH wisdom,
teach dem neva fi discriminate, not even 'gainst a lisp tongue.
taech dem fi love dem bredda, even dem weh born & grow a kingston,
cause a one family, and parish line a jus fi bring dung.
teach dem fi talk fi dem rights, nuh mek nuh man trick dem wid nuh freedom,
teach dem fi love dem woman, and nuh more "breed up & fling dung".
teach dem di Ites, mek dem i-herit LIFE KINGDOM,
i-yute a hail Haile Selassie I and give yanks fi all LIFE bring come.

OnePerfectLove